Wikipedia

Tempada 1910/11 do Deportivo da Sala Calvet

tempada deportiva

A tempada 1910/11 foi a quinta tempada de existencia do Deportivo da Sala Calvet.

Deportivo da Coruña
Tempada 1910–11
PresidenteGalicia José Longueira Díaz
EstadioCampo de Riazor
← 1909–10 1911–12 →

Resumo da tempada

editar

O Deportivo da Coruña iniciou a tempada 1910/11 cun partido amigable en beneficio da asociación El Niño Descalzo. Inicialmente, o Real Club Coruña era o outro equipo convidado, pero rexeitou a invitación, polo que o Deportivo enfrontouse finalmente ao Victoria de Ferrol, o club da Construtora Naval, empatando a dous goles.[1][2]

Tanto o Deportivo como o Coruña inscribíronse en 1910 por primeira vez no Campionato de Galicia que viña organizando en Vigo o Vigo FC e disputaron antes unha eliminatoria previa para decidir o representante coruñés no torneo, que sería o que antes chegase ás dúas vitorias. No primeiro encontro, disputado o 9 de outubro, saíu triunfante o Coruña, cun gol de Sindo, mentres que unha semana despois, nun tenso e violento partido, non se pasou do empate (1-1). Finalmente, o 23 de outubro xogouse en Riazor un terceiro encontro, no que o Deportivo aliñou a Ramos, Ancos, Rodilla, José de Llano, Ocaña, Rajoy, Johnson, Ángel Rodríguez, Manuel Álvarez, Félix de Paz e Mejuto. Nun partido de novo duro e violento, a vitoria foi para o conxunto de Monelos, grazas a un solitario gol de Monasterio.[3]

En 1911 o Deportivo inscribiuse na primeira edición da Copa Urzaiz, competición organizada polo Vigo FC, á que se apuntaron outros tres clubs coruñeses: Galicia, Real Club Coruña e María Pita. Estes dous últimos acabaron retirándose, polo que o Deportivo xogou contra o Galicia unha eliminatoria para decidir o representante coruñés na competición. Despois de que o árbitro lle anulase dous goles ao Galicia, este equipo deixouse marcar varios goles como protesta, rematando o encontro cunha goleada por 9-0 a favor do Deportivo.[4][5] Con todo, o Deportivo non chegou a disputar a Copa Urzaiz, pois a súa petición de adiar o seu encontro, programado para esa mesma semana, foi rexeitada.[4]

En febreiro de 1911 o conxunto coruñés enfrontouse a un equipo formado por mariñeiros ingleses dos cruceiros lixeiros Liverpool e Gloucester, que viñan de derrotar a varios clubs da provincia de Pontevedra, e conseguiu unha memorable vitoria por 3-0.[6][7][8] Uns días despois o Deportivo recuperou a Copa Gabino Bugallal, organizando unha segunda edición cun regulamento aprobado pola Federación Española. Inscribíronse, ademais do Deportivo, os coruñeses Galicia, Everton, Celita e María PIta, o santiagués Gimnasio, o ferrolán Victoria e o betanceiro Brigantino.[9]

O Deportivo iniciou a súa andadura no torneo xa en semifinais, derrotando por 4-0 ao Gimnasio, cun triplete de Paco Macho.[10] Antes da continuación do torneo, o Deportivo afrontou outros compromisos, e en abril xogou en dúas ocasións ante o Vie au Grand Air du Médoc francés, sendo este o primeiro club estranxeiro ao que se enfrontou na súa historia, pois os equipos ingleses contra os que xogara anteriormente eran tripulacións de diferentes buques.[11] Nun campo de Riazor ateigado cuns 3.000 espectadores, o Deportivo conseguiu a vitoria por 3-2 no primeiro encontro e un empate ao día seguinte.[11]

A finais de abril chegou á Coruña o Racing Club de Irún para disputar dous amigables contra o Deportivo, encontros que tiveron unha gran repercusión na cidade, enchendo o campo de Riazor dous días seguidos.[12] No primeiro deles, no que debutou co club galego Pinto de Carvalho, o primeiro futbolista portugués da historia do club, adiantouse o Deportivo cun gol de Macho, antes de que o Racing lle dese a volta ao marcador con dous goles e de que de novo Macho puxese o empate definitivo.[13] No segundo partido, o Racing goleou por 4-0 aos coruñeses, sendo todos os goles obra do histórico Patricio Arabolaza, ata que o partido se suspendeu trala grave lesión de Baldomero Martínez, que sufriu unha rotura de tibia e peroné.[14]

Os seguintes partidos do Deportivo foron amigables contra o María Pita (vitoria por 3-0) e contra o Fortuna de Vigo. O partido contra os vigueses, programado para o día 15 de xuño, suspendeuse aos 15 minutos por mor da intensa choiva caída sobre o campo de Riazor, mesmo motivo que obrigou á suspensión do encontro ao día seguinte, tras 5 minutos de xogo.[15] A continuación participou na Copa da Asociación da Prensa da Coruña, xunto a Fortuna e Vigo, torneo que foi gravado polo cineasta Eduardo Villardefrancos para o seu filme Torneo de foot ball, un documental estreado un mes despois no Salón de París da Rúa Real e que supón a segunda gravación en vídeo dun partido de fútbol en España.[16] No primeiro encontro o Deportivo caeu ante o Vigo por 1-2, mentres que no segundo o Fortuna derrotou ao outro conxunto vigués. A Asociación da Prensa establecía un terceiro partido para decidir o campión, pero o Fortuna emprendeu a viaxe de regreso a Vigo, considerando que o título era xa seu, pois derrotara ao club que gañara ao Deportivo. Máis tarde a Federación Española declarou vencedor ao Fortuna, aínda que o trofeo quedou en mans do Deportivo.[17]

O 2 de xullo disputouse en RIazor a final da Copa Gabino Bugallal entre o Deportivo e o Everton, resultando vencedor o primeiro por 5-1. A continuación o Deportivo xogou sete encontros amigables, destacando as súas vitorias contra os cadetes da Academia de Infantería de Toledo e contra Gimnástica de Madrid.[18] Xa en agosto caeu goleado por 5-0 diante do Fortuna de Vigo no campo de Bouzas, nun encontro correspondente á Copa López Seoane.[19]

Persoal

editar

Xogadores

editar
Pos Nac Nome
POR   Rogelio Ramos
DEF   Rodilla
DEF   Ancos
DEF   Wiilson
MED   José de Llano
MED   Jack Johnson
MED   Manuel Ocaña
MED   Ángel Rodríguez
MED   Samuel Campbell
MED   Ramón Portela
MED   Rosendo Silva
MED   Pinto de Carvalho
DIA   Virgilio
DIA   Macho
DIA   Parra
DIA   Manuel Álvarez
DIA   Ramón Blanco-Rajoy
DIA   Mejuto
DIA   César Pita
DIA   Antonio Portela
DIA   Félix de Paz
DIA   Antonio Catoira
DIA   José Rodríguez
DIA   Vicente González
DIA   Eduardo Silva
DIA   Barreiro
DIA   Joaquín Pérez

Xunta directiva

editar
Cargo Nome
Presidente   José Longueira Díaz
Vicepresidente   Sixto Pedregal
Tesoureiro   Francisco Domínguez
Contador   Virgilio Rodríguez
Secretario   Salvador Fojón

Partidos

editar

      Vitoria

      Empate

      Derrota

Amigables

editar
  1. ↑ O partido suspendeuse aos 15 minutos por mor da choiva e adiouse ao día seguinte.
  1. ↑ O partido suspendeuse aos 5 minutos por mor da choiva.

Campionato de Galicia (Vigo)

editar

Copa Urzaiz

editar

Copa Gabino Bugallal

editar

Copa Asociación da Prensa da Coruña

editar

Notas

editar
  1. ↑ Ventureira 2022, p. 117.
  2. ↑ "De Sport". El Correo de Galicia (en castelán). 13 de setembro de 1910. p. 2. Consultado o 26 de xaneiro de 2025. 
  3. ↑ Ventureira 2022, pp. 118-119.
  4. ↑ 4,0 4,1 Ventureira 2022, p. 126.
  5. ↑ "Notas de Sport". El Noroeste (en castelán). 27 de xaneiro de 1911. p. 2. Consultado o 26 de xaneiro de 2025. 
  6. ↑ "Los partidos de ayer - Foot-ball y rugby". El Noroeste (en castelán) (5566). 14 de febreiro de 1911. p. 1. Consultado o 28 de xaneiro de 2025. 
  7. ↑ "Partidos de football y de rugby". El Eco de Galicia (en castelán). 14 de febreiro de 1911. p. 1. Consultado o 2 de decembro de 2024. 
  8. ↑ Ventureira 2022, p. 128.
  9. ↑ Ventureira 2022, pp. 128-129.
  10. ↑ "Campeonato provincial". El Noroeste (en castelán) (5614). 3 de abril de 1911. p. 1. Consultado o 28 de xaneiro de 2025. 
  11. ↑ 11,0 11,1 Ventureira 2022, p. 131.
  12. ↑ Ventureira 2022, pp. 132-133.
  13. ↑ "Notas de sport". El Noroeste (en castelán) (5631). 1 de maio de 1911. p. 1. Consultado o 29 de xaneiro de 2025. 
  14. ↑ "Racing-Deportivo". El Noroeste (en castelán) (5632). 2 de maio de 1911. p. 1. Consultado o 29 de xaneiro de 2025. 
  15. ↑ Ventureira 2022, p. 135.
  16. ↑ Ventureira 2022, p. 142.
  17. ↑ Ventureira 2022, p. 137.
  18. ↑ Ventureira 2022, pp. 139-141.
  19. ↑ "Notas de sport". El Noroeste (en castelán) (5731). 9 de agosto de 1911. p. 1. Consultado o 31 de xaneiro de 2025. 

Véxase tamén

editar

Bibliografía

editar
  • Ventureira, Rubén (2022). De la Sala Calvet al título olvidado [Da Sala Calvet ao título esquecido] (en castelán). A Coruña: Fundación Real Club Deportivo de La Coruña SAD. ISBN 978-84-09-46119-6. 
Traído desde «https://gl.wiki.x.io/w/index.php?title=Tempada_1910/11_do_Deportivo_da_Sala_Calvet&oldid=6958936»