Wikipedia

Tempada 1911/12 do Deportivo da Coruña

tempada deportiva

A tempada 1911/12 foi a sexta tempada de existencia do Deportivo da Coruña. Durante esta campaña, o club competiu no Concurso España, proclamándose campión ao derrotar ao Vigo FC. Máis de 110 anos despois, en marzo de 2023, a Real Federación Española de Fútbol recoñeceu a oficialidade do torneo, sendo así considerado o primeiro título na historia do Deportivo.[1]

Deportivo da Coruña
Tempada 1911–12
PresidenteGalicia José Longueira Díaz
EstadioCampo de Riazor
← 1910–11 1912–13 →

Resumo da tempada

editar

O 24 de setembro de 1911 a directiva do Deportivo reuniuse nunha xunta xeral extraordinaria, na que se aprobou o cambio de nome proposto por Federico Fernández-Amor Calvet. Así, o club eliminou da súa denominación a referencia á Sala Calvet e incorporou o nome da Coruña.[2][3] O club non disputou o seu primeiro partido da tempada ata o 3 de marzo de 1912, case sete meses despois do seu último encontro, e fíxoo cunha vitoria por 5-0 sobre o Everton coruñés en Riazor.[4]

O último día do mes derrotou na Coruña ao Compostela, con dúas incorporacións procedentes do seu máximo rival, o Real Club Coruña: o vigués Quincho Yarza e o coruñés José de Llano, que regresou ao Deportivo un ano despois da súa saída.[4] Nos seguintes dous meses disputou amigables contra o Victoria de Ferrol e contra unha selección dos clubs coruñeses Galicia, Machaquito e Celita. O 6 de xuño deu inicio unha serie de tres partidos amigables contra o Internacional de Lisboa, o primeiro rival portugués da historia do club. O balance final do triplo enfrontamento, que tivo lugar en Riazor, foi de unha vitoria, un empate e unha derrota para cada equipo.

Xa en agosto, pisou Riazor o Racing Club de Irún, reforzado con xogadores do Athletic Club e do FC Barcelona, para xogar dous partidos contra o Deportivo. O equipo vasco, un dos rivais máis fortes aos que se tiña enfrontado ata entón o Deportivo, demostrou a súa superioridade cun resultado global de 7-0, a pesar de que no primeiro partido só se disputou a primeira parte por mor da intensa choiva caída na Coruña.[5]

O 7 de setembro de 1912, o Deportivo e o Vigo FC disputaron en Riazor a final da Copa España. O partido suspendeuse a falta de cinco minutos para o remate, por mor de falta de luz, cando o Deportivo vencía por 4-3, grazas a dous goles de Virgilio, un de Barreiro e outro de Parra. Ambos clubs acordaron xogar o que restaba de partido ao día seguinte. Nese encontro produciuse a primeira morte rexistrada nun partido de fútbol en España, cando o seareiro Ricardo Cadaveira Sánchez recibiu o impacto dunha pedra lanzada polo mariñeiro David Rodríguez Neira.[6] Foi atendido no propio campo polo doutor Manuel Barbeito, pero acabou falecendo.[7]

O partido continuouse ao día seguinte, xogándose os cinco minutos restantes sen moverse o marcador, polo que o club coruñés logrou o primeiro título da súa historia.[8][9] A continuación ambos clubs xogaron un encontro amigable no que a vitoria foi para o equipo vigués por 2-3.[10] Máis de 110 anos despois, en marzo de 2023, a Real Federación Española de Fútbol recoñeceu a oficialidade da Copa España.[1]

En outubro, o Deportivo xogou un partido contra o María Pita (reforzado con catro xogadores do Real Club Coruña), correspondente á eliminatoria previa ao Campionato do Noroeste de España organizado en Lugo con motivo das festas de San Froilán e cuxa final estaba programada para dous días despois. O Deportivo venceu por 2-0 e viaxou a Lugo para disputar a final, pero o seu rival, o Vigo FC, non se presentou, polo que o club coruñés foi proclamado campión.[11] Ese mesmo día xogou o seu último partido da tempada, un improvisado encontro ante xogadores lucenses que rematou cunha ampla goleada coruñesa por 0-11.[11]

Persoal

editar

Xogadores

editar

Xunta directiva

editar
Cargo Nome
Presidente   José Longueira Díaz
Vicepresidente   Sixto Pedregal
Contador   Virgilio Rodríguez
Secretario   Salvador Fojón

Partidos

editar

      Vitoria

      Empate

      Derrota

Amigables

editar
  1. ↑ O partido suspendeuse cando o Deportivo gañaba por 1-0, ao pinchárense todos os balóns.
  1. ↑ O partido suspendeuse no minuto 47, cando o Deportivo perdía por 0-3, debido á intensa choiva que caía.

Copa España

editar
  1. ↑ O partido suspendeuse a falta de cinco minutos debido á falta de luz e foi completado ao día seguinte.

Copa Noroeste de España

editar
  1. ↑ O Deportivo foi proclamado vencedor por incomparecencia do rival.

Notas

editar
  1. ↑ 1,0 1,1 "La RFEF entrega al RC Deportivo el trofeo del Concurso España de 1912". Real Federación Española de Fútbol (en castelán). 10 de abril de 2023. Consultado o 31 de xaneiro de 2025. 
  2. ↑ "Notas de sport". El Noroeste (en castelán) (5775). 25 de setembro de 1911. p. 1. Consultado o 31 de xaneiro de 2025. 
  3. ↑ Ventureira 2022, p. 143.
  4. ↑ 4,0 4,1 Ventureira 2022, p. 152.
  5. ↑ Ventureira 2022, p. 157.
  6. ↑ "Muerto de una pedrada". Diario de Pontevedra (en castelán) (8501). 11 de setembro de 1912. p. 1. Consultado o 2 de febreiro de 2025. 
  7. ↑ "Muerto de una pedrada". La Voz de Galicia (en castelán). 8 de setembro de 1912. p. 2. 
  8. ↑ Ventureira 2022, pp. 14-17.
  9. ↑ "La RFEF reconoce al Levante como campeón de la Copa de la República de 1937 y al Deportivo del Concurso de España 1912 | www.rfef.es". Real Federación Española de Fútbol (en castelán). Consultado o 2 de febreiro de 2025. 
  10. ↑ "Partidos de "foot-ball"". El Noroeste (en castelán) (6222). 9 de setembro de 2025. p. 1. Consultado o 2 de febreiro de 2025. 
  11. ↑ 11,0 11,1 Ventureira 2022, p. 158.

Véxase tamén

editar

Bibliografía

editar
  • Ventureira, Rubén (2022). De la Sala Calvet al título olvidado [Da Sala Calvet ao título esquecido] (en castelán). A Coruña: Fundación Real Club Deportivo de La Coruña SAD. ISBN 978-84-09-46119-6. 
Traído desde «https://gl.wiki.x.io/w/index.php?title=Tempada_1911/12_do_Deportivo_da_Coruña&oldid=6960596»