Tesouro de Everlöv
O tesouro de Everlöv é un conxunto de máis de 900 moedas e outros obxectos de prata pertencentes á cultura viquinga e datados entre os séculos IX e XI, aparecido en Evarlöv, Escania, na década de 1980.
| Tesouro de Everlöv | |
 | |
| Tipo | Ca. 900 moedas |
| Data | Séculos IX a XI. |
| Cultura | Viquinga. |
| Características | |
| Materiais | Prata. |
| Descuberta | |
| Localización | Everlöv, Escania. Suecia.
|
| Data | Década de 1980 |
| Conservación | |
| Localización | Ekonimiska Museet - Gabinete Real de Moedas de Estocolmo |
Achado e conservación
editarA existencia do tesouro de Everlöv coñeceuse na década de 1980, cando un cidadán informou da súa aparición casual dentro dun moble que recibira en herdanza.[1] Descoñécese o lugar exacto do ocultamento orixinal, mais é probable que fose nalgún lugar de Escania, no sur de Suecia.[2][3]
Logo da súa aparición, o conxunto foi estudado por numismáticos do Museo Histórico da Universidade de Lund e, logo dun proceso xudicial, seguiu en propiedade da familia que o descubriu, ata que esta decidiu sacalo á venda en poxa pública na primavera de 2022. Antes de que a poxa chegase a producirse, dúas fundacións para a investigación numismática —a Sven Svensson e a Gunnar Ekström— acordaron a súa adquisición para que pasase a formar parte do Ekonomiska Museet, do Gabinete Real de Moedas de Estocolmo.[2][3][1]
Unha escolma de pezas procedentes do tesouro de Everlöv formou parte da exposición "Unha vida viquinga", aberta no Museo Centro Gaiás da Cidade da Cultura de Galicia entre xullo de 2024 e xaneiro de 2025.[4][5]
Contido
editarO conxunto está constituído por 912 moedas e outros 40 obxectos diversos, todos eles de prata. As moedas máis antigas datan de arredor do ano 800 e as máis recentes están cuñadas cara ao ano 1018.[2][3][1]
Unha gran parte das moedas proceden de cecas bávaras, algo habitual nos achados en territorio sueco desta época, e tamén é abundante a presenza de moedas angloescandinavas, é dicir, cuñadas por monarcas escandinavos a imitación das moedas da inglaterra anglosaxoa. Pola súa banda, as moedas máis recentes son de procedencia dinamarquesa.[3]
O resto do tesouro é variado, con obxectos como un alfinete con figuras zoomorfas, unha lúnula eslava ou unha moeda bracteada de Henrique II (1014-1024) convertida en xoia.[3]
Notas
editar- ↑ 1,0 1,1 1,2 "Rescued Swedish Viking hoard to go on display in museums instead of being sold to private buyers". En The Viking Herald. 29 de abril de 2022.
- ↑ 2,0 2,1 2,2 "The Everlöv treasure". Ekonomiska Museet (Ekonomiskamuseet.se).
- ↑ 3,0 3,1 3,2 3,3 3,4 "Swedish charity funds save unique Viking treasure". Lovecpokladu.cz
- ↑ "Unha vida viquinga". Cidadedacultura.gal
- ↑ "Everlöv hoard". En Exhibition: A Viking Life. Gaiás, Cidade da Cultura. Páxina 5.