Río Lambre

Para outras páxinas con títulos homónimos véxase: Lambre.

O Lambre é un pequeno río galego da provincia da Coruña, que verte as súas augas na ría de Betanzos.

Río Lambre

Río Lambre
Tipo	río
Inicio
División administrativa	Provincia da Coruña, España
Localización	Monfero
Final
División administrativa	Provincia da Coruña, España
Localización	Ría de Betanzos
43°19′50″N 8°11′46″O
Características
Dimensións	15 () km

Percorrido

O Lambre nace a 600 m de altura no monte da Pena da Uz (705 m), no concello de Monfero. Atravesa este concello e os de Vilarmaior, serve de linde entre este e o de Irixoa, e logo entre os de Miño e Paderne, para acabar desembocando na Ponte do Porco, novamente no municipio de Miño, na beira dereita da ría de Betanzos, despois dun percurso de 15 km.

Afluentes

Os afluentes deste río son pequenos regos de curto percorrido. Cabe citar na cabeceira, e pola beira dereita, o Lambruxo.

Réxime hídrico

O Lambre é un río de réxime pluvial, do tipo oceánico.

Explotación

Sobre o Lambre, no concello de Vilarmaior, sitúase o encoro de Guimil, propiedade de Gas Natural Fenosa.

Étimo

Ponte medieval sobre o Lambre, entre Miño e Paderne.

O hidrónimo correspóndese coa denominación de tres lugares nos concellos de Irixoa e Paderne, que en principio parecen deber o seu nome ao do río. A fins do século XI (circa 1092) é citado xa como flumen Lambre. A partir de aí a cuestión está aberta. Luís Monteagudo propuxo un étimo *Lamaris, que evoluiría como Tamaris a Tambre (habería que supor desde un acusativo *Lamare, como para Tamare). Mais Schmoll supón que é comparábel ao Lambro, un afluente do Po, en Italia, para o que Krahe sostivo unha orixe iliria. O nome tamén se ten comparado á Flavia Lambris, unha cidade de época romana sita ás beiras do Cantábrico e mais outra denominada, con lectura insegura, Lambriaca ou Lambrica.

Galería de imaxes

Artigo principal: Galería de imaxes do río Lambre.

• 
  Río Lambre.
• 
  A Ponte do Porco na desembocadura
• 
  Praia da Alameda na marxe dereita da desembocadura.
• 
  Desembocadura do río Lambre.