María Gallego Abeledo

María de los Remedios Gallego Abeledo, coñecida como Marita ou Lina, nada en Vigo o 16 de xaneiro de 1928 e finada en Val do Oise en 1962, foi unha guerrilleira antifranquista galega.

María Gallego Abeledo

Biografía
Nacemento	16 de xaneiro de 1928 Vigo, España
Morte	1962 (33/34 anos) Val do Oise, Francia
Causa da morte	cancro
Actividade
Ocupación	maquis
Membro de	Exército Guerrilleiro de Galicia
Carreira militar
Conflito	guerra civil española
Familia
Irmáns	Juan Gallego Abeledo Josefa Gallego Abeledo

Traxectoria

O seu pai Manuel Gallego Durán e o seu tío Antonio Gallego Durán foron asasinados polos franquistas en 1936. Xunto cos seus irmáns Josefa, Clementina, Guillermo e Juan Gallego Abeledo, coñecidos como Os Buzos, incorporouse á guerrilla. Comezou colaborando cos fuxidos facendo todo tipo de traballos. Cando a presión se fixo insoportable integrouse coa súa irmá Josefa na IV Agrupación do Exército Guerrilleiro de Galicia. Foi a compañeira de Francisco Rey Balbís. Foi comisaria política do destacamento Enrique Líster da IV Agrupación. Pasou tempo agochada coa súa irmá Josefa e outros guerrilleiros no refuxio de Goente (As Pontes de García Rodríguez).

Atravesou os Pireneos en 1950 co seu compañeiro Moncho e pasou a Francia. En 1951 regresou a Galicia coa consigna de trasladar a Francisco Martínez Leira a Francia, pero este negouse. En París fixo de enlace entre os comunistas franceses e españois. Morreu en Blanc-Mesil-Argenteuil (Val do Oise) en 1962 a consecuencia dun cancro.

Véxase tamén

Bibliografía

• Marco, Aurora (2007). Dicionario de Mulleres Galegas. Vigo: A Nosa Terra. pp. 179–180. ISBN 978-84-8341-146-9. 

• Martínez, Lupe (2023). Guerrilleir@s antifranquistas da provincia da Coruña. Vigo: Galaxia. pp. 253–254. ISBN 978-84-1176-172-7. 

Ligazóns externas

• Guerrilleiras Arquivado 24 de agosto de 2016 en Wayback Machine.