Johann Bernoulli
Johann Bernoulli ((tamén coñecido como Jean en francés ou John en inglés), nado en Basilea o 27 de xullo de 1667 en Basilea, finado o 1 de xaneiro de 1748, foi un matemático suízo.[1]
Traxectoria
editar
Inicialmente estudou medicina. O seu irmán Jakob Bernoulli ensinoulle matemáticas.[1][2] O feito de que ás veces o seu nome apareza numerado débese á existencia dun Johann II Bernoulli, nacido máis tarde na familia.
Co seu irmán Jakob, desenvolveu un traballo que precedeu en moito ao cálculo de Gottfried Leibniz. Foi acusado de ter roubado ideas ao seu irmán Jakob e de expulsar da casa o seu fillo Daniel Bernoulli por gañar un premio da Academia Francesa de Ciencias, polo que el mesmo estaba a competir. Fixo investigacións fundamentais sobre cálculo variacional.
O seu primeiro emprego académico foi en Groningen en 1695 como profesor de matemáticas. Despois da morte de Jakob en 1705, ocupou o seu lugar en Basilea.[1] Fixo moito para divulgar o cálculo na Europa. O seu campo de actividade incluía a física, a química, a astronomía, así como as matemáticas. En ciencia aplicada, contribuíu extensamente á óptica, escribiu sobre a teoría das mareas e a teoría matemática da navegación. Mantívose activo ata uns días antes da súa morte, aos oitenta anos.
Contribuíu aínda en varias áreas da matemática aplicada, incluíndo o movemento dunha partícula nun campo gravitatorio. Estabeleceu a ecuación da catenaria en 1690. Propuxo unha máquina de movemento perpetuo.
En 1697, propuxo un problema que se converteu na base do cálculo de variacións: cal é a curva que une dous puntos dados, de tal xeito que unha partícula pesada móvese ao longo da curva, desde o punto superior ata o punto inferior, no tempo mínimo? Despois de ser publicado, permaneceu sen resposta durante aproximadamente un semestre. Este problema foi recibido pola Royal Society que llo enviou a Isaac Newton pola tarde; Newton devolveuno solucionado á mañá seguinte e, segundo John Conduitt, o problema resolveuse o mesmo día en que foi recibido, antes de que Newton fose durmir esa noite. A solución foi enviada entón a Bernoulli sen identificar o autor, quen ao lelo recoñeceu ao instante ao responsábel, exclamando en latín, tanquam ex ungue leonem (traducido como "o león recoñécese pola súa pouta"), en referencia ao distinto método de Newton.[3]
Notas
editar- ↑ 1,0 1,1 1,2 "Johann Bernoulli | Swiss mathematician". Encyclopedia Britannica (en inglés).
- ↑ "johann bernoulli". Consultado o 2018-09-22.
- ↑ Newton, Isaac (2005-05-01). Observations upon the Prophecies of Daniel, and the Apocalypse of St. John (en inglés). Impresso em 1733 por J. Darby e T. Browne. Produzido em 1991 por Arthur Brouhard Robinson. Cave Junction, E.U.A. ISBN 0-942487-02-8.