Hugh Falconer

Hugh Falconer, nado en Forres, Escocia, o 29 de febreiro de 1808 e finado en Londres, Inglaterra, o 31 de xaneiro de 1865, foi un xeólogo, botánico, paleontólogo e paleoantropólogo escocés. Foi o primeiro en suxerir a moderna teoría do equilibrio puntuado.

Hugh Falconer

Biografía
Nacemento	29 de febreiro de 1808 Forres, Reino Unido (pt)
Morte	31 de xaneiro de 1865 (56 anos) Londres, Reino Unido
Lugar de sepultura	cemiterio de Kensal Green
Educación	Universidade de Edimburgo Universidade de Aberdeen
Director de tese	Robert Jameson
Actividade
Campo de traballo	Botánica, xeoloxía, paleontoloxía, Paleoantropoloxía e medicina
Ocupación	botánico, paleoantropólogo, paleontólogo, xeólogo
Membro de	Accademia delle Scienze di Torino (1844–) Royal Society
Obra
Abreviación dun autor en botánica	Falc.
Abreviatura do autor en zooloxía	Falconer
Premios
(1837)  Medalla Wollaston  membro da Royal Society
Descrito pola fonte	Nordisk familjebok Dictionary of National Biography Dicionario Enciclopédico Brockhaus e Efron

Traxectoria

Estudou a flora e fauna da India, Assam e Birmania, así como de moitas illas do Mediterráneo. Tamén investigou os fósiles da cordilleira Sivalik, entre a India e o Paquistán, onde realizou o que foi, probablemente, o primeiro achado dun fósil dun simio.

Falconer era nun principio un creacionista que negaba a teoría evolutiva. Porén, en 1859 Charles Darwin envioulle unha copia da súa obra A orixe das especies, cunha carta na que dicía: "Estou totalmente convencido de que, ano tras ano, volveraste menos firme na túa crenza na inmutabilidade das especies". En xuño de 1861, Falconer expresou o seu respecto polo biólogo nunha carta a Darwin por recibir o libro. A principios da década de 1860 volveu avaliar a súa visión do mundo e chegou a abrazar a evolución a partir dos seus estudos sobre o rexistro fósil.

En 1863, Falconer escribiu unha monografía sobre o elefante fósil americano das rexións que bordean o golfo de México. Un ano antes enviara en privado o seu traballo a Darwin, quen se amosou encantado de lela. Nel observou longos períodos de estase evolutiva en mamíferos fósiles con períodos curtos de rápido cambio evolutivo ao longo do tempo xeolóxico. Esta observación amosa unha gran previsión. Niles Eldredge e Stephen Jay Gould desenvolveron a mesma teoría básica un século despois, unha teoría coñecida como equilibrio puntuado. Segundo Gould, o traballo "anticipa unha inferencia primaria de equilibrio puntuado: que un patrón local de substitución brusca non significa transformación macromutacional in situ, senón unha orixe da especie posterior a partir dunha poboación ancestral que vive noutro lugar, seguida da migración cara ao lugar local".

Darwin incluíu unha mención a esta afirmación de Falconer nas edicións posteriores d'A orixe das especies. Lonxe de refutala, cualificouna como "consideración importante" .