Enrique de Arce Temes

Enrique de Arce Temes, nado en Ourense o 3 de abril de 1937, é un xornalista e músico de jazz galego.

Enrique de Arce Temes

Biografía
Nacemento	(mul) José Enrique de Arce Temes 3 de abril de 1937 (87 anos) Ourense, España
Educación	Escola Oficial de Xornalismo
Actividade
Ocupación	xornalista, escritor, músico
Familia
Fillos	Alejandro de Arce, Marco Antonio de Arce
Irmáns	Álvaro de Arce Temes
Descrito pola fonte	Enciclopedia Galega Universal Dicionario biográfico de Galicia Gallegos

Traxectoria

Con oito anos trasladouse a Lugo, onde estudou o bacharelato e cursou peritaxe mercantil, rematando o ensino medio en 1953. Graduouse en xornalismo pola Escola Oficial de Xornalismo de Madrid, comezando a colaborar durante esta época no xornal El Progreso. Residiu en Berlín entre os anos 1959 e 1966, onde se dedicou profesionalmente á música jazz, tocando a batería e mais a guitarra. A partir de 1966 estableceuse na Coruña, comezando a traballar para La Voz de Galicia e o semanario deportivo Riazor. En 1968 abandonou La Voz de Galicia para incorporarse a El Ideal Gallego, acompañando a Pedro de Llano López, e en 1982 pasou a ser o director do xornal.

No ano 1985 incorporouse á Televisión de Galicia para exercer como xefe de redacción dos servizos informativos e en 1988 como xefe do servizo de documentación e arquivo. No ano 1988 foi nomeado xefe de prensa de Alianza Popular en Galicia, abandonando o cargo en 1990 para reincorporarse á TVG como director do departamento de programación e emisións, e en 1992 como xefe de prensa da CRTVG.

Colaborou noutros diarios como ABC, Ya, La Gaceta del Norte, La Vanguardia e na axencia Logos da Editorial Católica; foi director da Asociación de Prensa da Coruña e colaborador literario e gráfico da Gran Enciclopedia Galega e da Enciclopedia Galega Universal.

Dirixe dende 1987 a revista de espeleoloxía Furada da Federación Galega de Espeleoloxía e foi un dos fundadores da Sociedade de Montaña Ártabros da Coruña.

Vida persoal

Casou coa empregada de banca e guía turística Ruth Andratschke Brandt con quen tivo dous fillos; Marco Antonio, pintor e deseñador gráfico e Alejandro, historiador e escritor. É irmán do militar, historiador e xornalista Álvaro de Arce Temes.

Obra

Xornalismo

En 1968 realizou unha reportaxe titulada «Cita nos Ancares» para El Ideal Gallego sobre a situación dos habitantes da serra dos Ancares, composta por varios artigos que foron recompilados e editados como libro baixo o título Os Ancares: A serra esquecida (2010). Os acontecementos descritos no libro e o testemuño dos protagonistas foron recollidos nun documental con título homónimo no ano 2012.

Conversaciones con cinco notables gallegos (2009) é un resumo das intervencións realizadas nas tertulias da "Peña del miércoles" da Coruña entre os anos 2002 e 2003 por cinco persoeiros galegos destacados: Xosé Ramón Barreiro, Ramón Núñez Centella, Fernando González Laxe, Felipe Senén López e Rogelio Groba.

• Conversaciones con cinco notables gallegos: las tertulias de la Peña del miércoles de A Coruña (2002-2003). Teófilo Piñeiro. 2009. p. 152. ISBN 978-84-937022-1-2. 
• Os Ancares: A serra esquecida. Teófilo Piñeiro. 2010. p. 97. ISBN 978-84-937022-8-1. 

Véxase tamén

Bibliografía

• Barrera, Feliciano, ed. (2002). "Arce Temes, Enrique de". Gallegos. Quién es quien en la Galicia del siglo XXI (en castelán). Santiago de Compostela: El Correo Gallego. ISBN 84-8064-113-4. 
• "Arce Temes, Enrique de" na EGU

Outros artigos

• Os Ancares: A serra esquecida (2012)

Ligazóns externas

• Biografía en Galegos (Galicia Digital)