Benito Paradela Nóvoa

Benito Paradela Nóvoa, nado en Poutás de Arriba (Amoeiro) o 22 de outubro de 1887 e finado en Madrid o 23 de outubro de 1936, foi un relixioso, historiador e arquiveiro galego.

Benito Paradela Nóvoa

Biografía
Nacemento	22 de outubro de 1887 Amoeiro, España
Morte	23 de outubro de 1936 (49 anos) Vallecas, España
Causa da morte	execución extraxudicial, ferida por arma de fogo
Actividade
Ocupación	relixioso, historiador, arquiveiro
Enaltecemento
beato
Descrito pola fonte	Gran Enciclopedia Galega Silverio Cañada Diccionario bio-bibliográfico de escritores

Traxectoria

Pasou a infancia xunto ao Santuario da Nosa Señora dos Milagres do Medo nos Milagres do Medo (Vide, Baños de Molgas), da orde dos Padres Paúles. Alí estudou Latín e Humanidades, e o 29 de agosto de 1907 ingresou na Congregación da Misión.

Estudou Filosofía e Teoloxía en Madrid, e recibiu o presbiterado o 21 de setembro de 1916. Foi destinado como docente ao colexio de Limpias (Cantabria), onde deu clase de Historia da Literatura, Historia de España, Xeografía e Lexislación mercantil. Permaneceu alí até o seu traslado a Madrid en 1922 logo de que o seu superior Joaquín Atienza, solicitase que se fixese cargo do arquivo. Amais de organizar o arquivo e a biblioteca da casa provincial dos misioneiros paúles, procurou aumentala. A súa vocación de investigador e historiador levouno a París, Barcelona, Palma ou Valencia co fin de reunir material para escribir a historia da Congregación da Misión en España. Consérvanse copias manuscritas por el de documentación desaparecida durante a guerra civil española. En 1928 foi nomeado director da revista Anales de la Congregación de la Misión y de las Hijas de la Caridad.

O 23 de outubro de 1936 foi asasinado en Vallecas. En novembro de 2017 foi beatificado.

Obras

• Resumen histórico de la Congregación de la Misión en España desde 1704 a 1868 (Madrid: Hernández y Galo Sáez, 1923)
• Los Visitadores de la Congregación de la Misión y Directores de las Hijas de la Caridad en España Tomo I: Apuntes biográficos (Madrid: Huérfanos, 1928)
• Centenario de los PP. Paules en Madrid. Libro conmemorativo en el que se narra el crecimiento de los Misioneros y de las Hijas de la Caridad por ellos dirigidas (Madrid: Voluntad, 1928)
• El Santuario de Nuestra Señora de los Milagros (apuntes históricos) (Madrid: Librería Puga, 1929)
• El P. Hilario Casabosca. Notas biográficas y extracto de algunas de sus cartas familiares (Madrid, 1929)
• Un gran pedagogo desconocido. Apuntes biográficos del P. Julián González de Soto (Madrid: Cleto Vallinas, 1930)
• Colección de documentos para la Historia de la Congregación en España. Tomo I (1702-1835) (Madrid, 1932)
• Notas biográficas de los que han pertenecido a la Congregación de la Misión en España. Tomo I (1695-1835) (Madrid: Cleto Vallinas, 1935)
• "El P. Feijóo. Sus ideas y su tiempo", en Vida Gallega
• "Apuntes para la historia del culto de la Virgen en España", en Anales de las Hijas de Madrid
• "España y la Inmaculada", en La Inmaculada de la Medalla Milagrosa

Colaborou tamén con artigos sobre documentos da igrexa e monumentos da provincia de Ourense no Archivo Histórico Nacional e no Boletín de la Comisión Provincial de Monumentos Artísticos e Históricos de Orense, nº 175, 178, 212, 214, 216 e 226 (1927, 1928, 1933, 1934 e 1936).

Véxase tamén

Bibliografía

• Couceiro Freijomil, A. (1954). "PARADELA NÓVOA, Benito". Diccionario bio-bibliográfico de escritores (en castelán) III. Santiago de Compostela: Bibliófilos Gallegos. p. 18-19. 
• "Paradela Nóvoa, Benito". Gran Enciclopedia Galega Silverio Cañada (DVD). El Progreso. 2005. ISBN 84-87804-88-8.